22 pd. rúgmjöl
6 pt. heitt vatn
súrdeig
5 teskeiðar salt

Mjölið er látið í deigtrogið. Súrdeigið er bleytt út í volgu vatni og látið í mjölið ásamt vatninu og saltinu. Deigið er nú hnoðað vel, þangað til það tollir ekki lengur við hendurnar, þá er það jafnað í troginu, stráð á það mjöli, síðan er lokið látið á trogið og deigið látið standa til næsta dags. Þá er það hnoðað og elt og búin til úr því aflöng brauð, sem síðan skal baka í ofni eða brauðpotti. Vatn skal bera ofan á brauðið um leið og þau eru látin í ofninn og auk þess tvisvar eða þrisvar þegar gáð er að brauðunum. Ögn af brauðdeiginu er geymt þangað til næst er búið til brauð, og salti stráð á það. Deigtrogið skal skafa vel innan í hvert sinn og strá innan í það mjöli og láta lokið á það; við og við skal þvo það innan og þurrka úti, helst í sólskini.
Kartöflur má brúka í brauð og eru þær þá þvegnar, soðnar og flysjaðar og marðar í sundur, síðan látnar út í deigið, um leið og það er lagt.
Fjallagrös má hafa í brauð og eru þau þá vinsuð, tínd, þvegin og soðin annaðhvort í mjólk eða vatni og látin í deigið. Einnig má brúk kál á sama hátt.
Kúmen má hafa í alls konar brauð.

(Hallgerður Gísladóttir, Íslensk matarhefð, Reykjavík, 1999)