750 g hreinsuð ýsa
2 msk hveiti
1 tsk salt
½ tsk pipar
1-2 laukar
100 g smjörlíki

Sósan:
4-5 dl fiskbeinasoð
1-2 msk hveiti
1 dl kalt vatn
Krydd
Sósulitur

Ýsan er hreinsuð og skafin úr roðinu þannig, að fiskurinn verði svo smár og jafn, að hann sé sem gróft saxaður. Beinin eru soðin í saltvatni um stund. Úr fiskinum eru mótaðar jafnstórar kúlur, sem gerðar eru kringlóttar og flatar með borðhníf á hveitistráðu bretti. Laukurinn hreinsaður, skorinn í sneiðar og brúnaður, tekinn af og settur á disk. Buffinu velt upp úr hveiti, ef vill, steikt móbrúnt á báðum hliðum og stráð á það salti og pipar. Síðan steikt við vægan hita í 5 mín. Harðni buffið mikið, er ein matskeið af beinasoði sett á það, svo að það verði mjúkt. Buffinu raðað á fat og haldið heitu. Beinasoðið sett á pönnuna. Þegar sýður, er það jafnað með hveitijafningnum. Krydd og sósulitur sett í eftir smekk. Laukurinn látinn út í og sósunni hellt yfir buffið. Borðað með soðnum kartöflum og hráu eða soðnu grænmeti. Einnig er gott að hafa steikarsósuleifar með.

Matur og drykkur, Helga Sigurðardóttir, Reykjavík 1991
Bókina er væntanlega hægt að nálgast í verslunum Máls og Menningar.